"حكاية ساير داير "

شعر/"أحمد عبدالحميد همام"
مأمور ضرائب
تسعة...تسعة...تلات تسعات
لما التعلب عدا وفات
لف ، ودار علي العتبات
وجه يغرينا ، ويخلينا
نبيع أسامينا.......
لجل يفوز في الانتخابات
تسعة...تسعة...تلات تسعات
وعجبي عليها الانتخابات
0000000
هيه حكاية "ساير داير"
مرشح نفسة عن دايرتنا
حاجة تخلي...الواحد حاير
من أيامنا ، ومن نوادرها
ضاحك باكي...من أحوالنا...ومن بلوتنا
ياحزن القلب...عليكي بلدنا
ياكل الدنيا ..شوفي خيبتنا
تسعة...تسعة...تلات تسعات
وعجبي عليها الانتخابات
0000000
"ساير داير" أصله معلم
بمطوة وبشلة...وشه معلم
ابن الإيه...دايما يبكي ولايتألم
ومشطف ياجماعة الطاسة
ومن صغره...بلطجي رقاصة
بيتعاطي اللي بيتاجر فيها
وعايز له حصانه...يتحصن
يتحامي ويتاجر بيها
وتسعة...تسعة...تلات تسعات
وعجبي عليها...الانتخابات
0000000
ساير داير جه يوعدنا
إنه هيبني لينا مستوصف
ولما عيالنا بكره هتكبر
رح يضمن إنها تستوظف
ساير داير أنا قلتله
ياعم الطيب،عمر في يوم ماكنت قريب
ساير داير بص وقال لي
من كام سنة أنا لفيت
كل الدايرة...شارع...حارة
وبيت ورا بيت
أنا لفيت كتير واديت
سمن وسكر...لحمة وزيت
ولاد الإيه...تقول عفاريت
أخدواالحاجة...وطلعت عبيط
نكروا خيرى...وهات تصويت
لواحد غيرى!!
هوه عدا...وأنا طبيت
وتسعة...تسعة...تلات تسعات
وعجبي عليها...الانتخابات
شعر/"أحمد عبدالحميد همام"
مأمور الضرائب